Repartiziun ladinaCun le scomenciamënt dl’ativité universitara tl 1998, él gnü istituì tla Facolté de Sciënzes dla Formaziun a Porsenù inće na Repartiziun ladina, cun le fin de ti pité ai insegnanć ladins na formaziun aposta te deplü lingac. La Repartiziun ladina à döes funziuns prinzipales. De un n vers pîtera na formaziun por maestres y maestri de scora y de scolina, che corespogn ales ghiranzes dl sistem scolastich paritetich adorè tles valades ladines, dl ater vers garantëscera na ativité d’inrescida importanta ti ćiamps dla linguistica ladina y dla didatica tles scores ladines.

La formaziun di maestri y dles maestres de scora y de scolina vëgn tignida te trëi lingac: ladin, todësch y talian, cun laprò la poscibilité de na spezialisaziun tl insegnamënt dl inglesc. Le practicum preodü tratan le stüde vëgn fat dantadöt te scores y scolines dles valades ladines. I proieć scientifics dla Repartiziun ladina reverda suradöt le lingaz ladin y la didatica te n sistem scolastich plurilingual. I colaboradus scientifics y i finanziamënc vëgn en pert dala Université instëssa, en pert da y tres inćiaries a d’atres istituziuns.


Ladinische Abteilung  (in deutscher Sprache)        Sezione Ladina  (in lingua italiana)