Prest duc nosc cursc é te trei lingac: les lezions y i ejams vegn tegnis per talian, todesc y ingleis. A la fin di studi giata i assolvenc de unibz, dlongia l diplom de laurea, ence l Diploma Supplement, con na zertificazion dl livel linguistich che an à arjont. Per podei se scrive ite a gran pert di cursc de laurea de unibz, végnel damané n zertificat dl livel almanco B2 per almanco doi di trei lingac de ensegnament.

Studié olache i autri fej vacanza. Ne fóssel nia valch de bel?

Canche ai ne à nia da studié y da emparé, pó i studenc dla unibz - che vegn da plu che 40 stac - se gode i vantaji da vive te un di raions plu biei dl'Europa. Tl Südtirol él na oferta culturala ampla y stimolanta, y per chi che fej gen sport - y nia demé chi da d'invern - é l raion n paraisc, con strutures modernes y atraentes. Da cornisc fej les Dolomites, patrimone mondial dl'umanité UNESCO.

A Bulsan, Persenon y Bornech él endut 600 posć ti studentac. I cosć mesans per na ciamena da soul é de 300 € y de 230 € per na ciamena dopla. Normalmenter pó les domandes per vegnì touc su te n studentat vegnì dedes ju do mez jugn. 

Les anunzies per les ciamenes y i apartamenc da podei tó adenfit giàten chiló:

• accommodationunibz.blogspot.it
• yost.apartments
• gruppo Facebook

Te vigniun di trei campus él n servisc de mensa con na lieta ampla de speises che i studenc pó chirì fora. Paié pàien con la Student Card.

I studenc fina a 27 agn pó compré l abonament ABO+ dla Provinzia Autonoma de Bulsan. Al costa 150 € y vel un n ann. Con l ABO+ pón tó duc i mesi de trasport publich dl Südtirol y les ferates regionales fina a Trent. 

Tles zités de Bulsan, Persenon y Bornech él - sciche te dut l Südtirol - dret saorì da tó la roda, deache al é na rei de stredes dla roda aposta. Te duc i campus de unibz rùven con la roda te manco che 15 menuc pian via dal zenter dles zités.

L cost dla vita tl Südtirol é plu o manco chel de d'autres zités turistiches tla Talia dl Nord. Toutes fora les coutes universitares, méssen araté che tl Südtirol adòren almanco 700 € al meis per vive (ciasa, speisa, materiai per l stude, guant, temp lede). 

Per deplù informazions consulteia l "Osservatore di priesc" dla Provinzia de Bulsan.

Stipendiums y sostegn finanziar

I studenc pó ti damané al Ofize per l dert al stude universitar n stipendium universitar che và, aldó dla situazion finanziara dl damanadour, dai 1.400 € ai 5.800 € al ann. Sce n student à l dert da giaté n stipendium, ti végnel ende retù les coutes universitares che al à paié. Les assoziazions sh.asus y MUA deida i studenc da scrive fora les domandes.

I studenc che ruva do da l prum ann sun na mesaria de notes soura l 27 pó damané do n stipendium de merit. 

I studenc da foradecà y i studenc taliagn che à la residenza foradecà pó lapró ciamó damané n stipendium al Ministere per i Afars Esters (MAE).

Te na université é l stude la cossa plu importanta. Mo avisa tant importantes é les relazions soziales con i autri membri dla comunité universitara. Les relazions danter i studenc vegn curedes da les sies assoziazions di studenc SCUB, k!kero, Pro - Students for Business, Exchange Student unibz, AlumniClub y, tl campus da Persenon, da Talìa UniLife. La manifestazion che tira l plu é vigni ann i SnowDays, organisés da SCUB, a chi che al tol pert plu de 600 studenc, trueps de chi scric ite a universités partner de unibz y che ruva per l prum iade tl Südtirol propi per via dl renom de chesta manifestazion sun la neif. 

Deplù iadi al ann deura unibz sies portes, a na moda che chi che à interes da se scrive ite poe conesce i cursc de stude dal daite. Tratant l Open Day pón vijité l'université y sies strutures, cialé ite te lezions universitares, y lapró ence jì a ti cialé ai studentac.

I studenc con debojegns particolars che volessa studié tla unibz pó sclarì sies domandes y si dubi (sun l'azessibelté di fabricac universitars, sun aiuc che ai giata y e.i.) contatan l Student Support. Sce n student con debojegns particolars à l dert y l damana, organiseia l'université ejams de amiscion aldó y met a desposizion duc i mesi tecnics y didatics che và debojegn.  

L Servisc Consulenza per l stude é la pruma portina per i studenc che adora informazions y che s'aoda n orientament personalisé sun i cursc de stude y sun la vita da student tla unibz. 

Tratant dut l ann academich ti pieta l Servisc Consulenza per l stude a studentes y studenc dl ultim ann dles scoles autes y a si ensegnanc la poscibelté da conesce plu daimpró unibz tres scomenciadives de orientament y de informazion.